Great Frames

പ്രഷ്യസ്

2010-12-13T16:18:00.000-08:00

പിതാവില്‍ നിന്നും ലൈംഗിക പീഡനവും അമ്മയില്‍ നിന്നും മാനസിക പീഡനവും നേരിടുന്ന ക്ലാരിസ്‌ പ്രഷ്യസ് ജോണ്‍സിന്‍റെ (ഗബൊരി സിട്ബി) കഥയാണ്‌ ആറു ഓസ്കാര്‍ നോമിനേഷനുകളില്‍ രണ്ടെണ്ണം കരസ്ഥമാക്കിയ പ്രഷ്യസ് എന്ന സിനിമ പറയുന്നത്. അതിനെല്ലാം പുറമേ ഈ കഥാപാത്രം കറുത്ത വര്‍ഗ്ഗക്കാരിയും, 300 പൗണ്ട് ഭാരമുള്ളവളും, ദരിദ്രയും, പന്ത്രണ്ടാം വയസ്സില്‍ സ്വന്തം പിതാവിന്‍റെ കുഞ്ഞിന് ജന്മം നല്‍കേണ്ടി വരികയും കൂടി ചെയ്യുമ്പോള്‍ അവള്‍ അനുഭവികുന്ന സാമൂഹികവും മാനസികവുമായ ഒറ്റപ്പെടല്‍ ഒരു മരുഭൂമിയോടോ കടലിനോടോ ഒക്കെ വേണമെങ്കില്‍ ഉപമിക്കാം. കാരണം പ്രതീക്ഷകളെല്ലാം അസ്ഥാനത്തായ അവസ്ഥ. ഈ അവസ്ഥയിലാണ് സിനിമ തുടങ്ങുന്നത്. സഫയറിന്‍റെ പുഷ് എന്ന നോവലിനെ ആസ്പദമാക്കി ലീ ഡാനിയേല്‍സ് സംവിധാനം ചെയ്ത പ്രഷ്യസിന്‍റെ തിരക്കഥ രചിച്ചിരിക്കുന്നത് ജെഫ്രി ഫ്ലെച്ചര്‍.

പ്രഷ്യസിന്‍റെ പീഡനങ്ങള്‍ അവിടെ തീരുന്നില്ല. അവള്‍ വീണ്ടും സ്വന്തം പിതാവിന്‍റെ ലൈഗിക പീഡനത്തിലൂടെ ഗര്‍ഭിണിയാകുന്നു. ഇത് മനസ്സിലാകുന്ന സ്കൂള്‍ അധികൃതര്‍ അവളെ സ്കൂളില്‍ നിന്ന്‍ ഒഴിവാക്കുന്നു. ഇനിയുള്ള രംഗങ്ങളിലാണ് പ്രഷ്യസ് തന്‍റെ അമ്മയില്‍ നിന്നും ശാരീരികവും മാനസികവുമായ പീഡനങ്ങള്‍ ഏറ്റ് വാങ്ങുന്നതും. പ്രഷ്യസിന്‍റെ അമ്മ മേരി യുടെ (മൊനിക്) അഭിനയം സംവിധായകന്‍ ലീ ഡാനിയല്‍സിന്‍റെ പ്രതീക്ഷകള്‍ക്ക്‌ അപ്പുറമാണെന്നുള്ളതില്‍ സംശയമില്ല. ഏറ്റവും നല്ല സഹനടിക്കുള്ള ഓസ്കാര്‍ അവാര്‍ഡു മോനികിനു ലഭിച്ചതില്‍ ഒട്ടും അത്ഭുതമില്ല.

അമ്മ മകളെ പീഡിപ്പിക്കുന്നത് തന്‍റെ പുരുഷന്‍ തന്നെക്കാളുപരി മകളെ ഇഷ്ടപെടുന്നു എന്ന തോന്നലില്‍ നിന്നുമാണ്.സദാസമയവും ടിവിയുടെ മുന്‍പില്‍ എരിയുന്ന സിഗരറ്റുമായി ഇരിക്കുന്ന മേരി കൈയില്‍ കിട്ടുന്നത് വച്ചായിരിക്കും മകളെ എറിഞ്ഞു വീഴ്ത്തുന്നത്. ഓരോ വീഴ്ചയിലും അവള്‍ ഓരോ സ്വപ്ന ലോകത്തിലേക്കാണ് പോവുന്നത്. ആര്‍ക്കുമറിയാത്ത അവളുടേത് മാത്രമായ അത്ഭുത ലോകം.

വീണ്ടും ഗര്‍ഭിണിയായ അവള്‍ക്ക് അല്പം ആശ്വാസമാകുന്നത് ഒരു പുതിയ സ്കൂളില്‍ ചേരുമ്പോള്‍ മാത്രമാണ്. അത് ഒരു alternative school ആണ്. പ്രഷ്യസിനെ പോലെ സമാന പ്രശ്നങ്ങളില്‍ പെട്ടവരാണ് അവളുടെ സഹപാഠികളും. അവള്‍ക്ക് പ്രതീക്ഷകള്‍ നല്കുന്ന അന്തരീക്ഷം പുതിയ സ്കൂളിലെ അവളുടെ കൂട്ടുകാരും അവരുടെ അധ്യാപികയുമാണ്. അധികം സംസാരിക്കാത്ത അവള്‍ മനസ്സ് തുറക്കുന്നതും ഈ ക്ലാസ്‌ മുറിയിലാണ്.

അങ്ങനെയിരിക്കെ ഒരു ദിവസം അവള്‍ തന്‍റെ രണ്ടാമത്തെ കുഞ്ഞിന് ജന്മം നല്‍കുന്നു. വീട്ടിലത്തുന്ന അവള്‍ക്കും കുഞ്ഞിനും അമ്മയുടെ മാരക പീഡനത്തില്‍ നിന്നും ഓടി രക്ഷപെടെണ്ടി വരുന്നു. അവള്‍ അഭയം തേടിയെത്തുന്നത് അവളുടെ സ്കൂളില്‍ തന്നെയാണ്. വീണ്ടും ഒരു നാള്‍ പ്രേഷ്യസിനെ അമ്മ കാണാന്‍ വരുന്നു. അവളുടെ അപ്പന്‍റെ മരണ വാര്‍ത്ത അറിയിക്കുന്നു. എയിഡ്സ് മൂലമുള്ള മരണം. പിന്നിടുള്ള ഞെട്ടലില്‍ അവള്‍ പോവുന്നത് വീണ്ടും ആ അത്ഭുത ലോകത്തേക്കാണ്. അവിടെ അവള്‍ ഒരു സെലിബ്രിറ്റിയാണ്. പിന്നീട് താനും ഒരു എയിഡ്സ് രോഗിയാണെന്ന് അവള്‍ തിരിച്ചറിയുന്നതോടെ പീഡനത്തിന്‍റെ പൂര്‍ത്തീകരണമാണ്. ഉള്ളവനും ഇല്ലാത്തവനും തമ്മില്‍ ഏറ്റവും കൂടുതല്‍ അന്തരമുള്ള അമേരിക്കയില്‍ എല്ലാ തരത്തിലും തകര്‍ക്കപെട്ട പ്രേഷ്യസില്‍ ഈ സ്വപ്ന ലോകം തീര്‍ക്കുന്നത് ചില സ്വാധീനങ്ങളാവാം. അധികം ലോക വിവരമില്ലാത്ത പ്രഷ്യസ് തന്നെ സമാന സാഹചര്യങ്ങളിലൂടെ ഉന്നതിയില്‍ എത്തി ആഫ്രിക്കന്‍ അമെരിക്കന്‍ സ്ത്രീകളുടെ ശബ്ധമായ ഓപ്രയെ കുറിച്ച് മാത്രം സംസാരിക്കുന്നുണ്ട്. (സിനിമയുടെ പ്രധാന നിര്‍മ്മാണം യഥാര്‍ത്ഥ ഓപ്രയാണെന്നുള്ളത് വേറെ കാര്യം).

സിനിമ അവസാനിക്കുന്ന രംഗങ്ങളില്‍ മിസ്സ്‌ വീസ് എന്ന സോഷ്യല്‍ വര്‍ക്കര്‍ (മരിയ കരെ) മേരിയില്‍ നിന്നും പ്രഷ്യസ് അനുഭവിക്കേണ്ടി വന്ന എല്ലാ തരത്തിലുമുള്ള ഗാര്‍ഹിക പീഡനങ്ങളുടെ സത്യം പറയിപ്പിക്കുന്നു. മൂന്നാം വയസ്സില്‍ തുടങ്ങിയ പീഡനത്തിന്‍റെ കഥ ഏകദേശം അവിടെ അവസാനിക്കുമ്പോള്‍ പ്രഷ്യസ് തന്‍റെ ജീവിതത്തില്‍ നിന്നും അമ്മയെ വേര്‍പെടുത്തി തന്‍റെ രണ്ടു കുട്ടികളെയും കൂട്ടി പ്രതീക്ഷയോടെ മുന്നോട്ട് നീങ്ങുന്നു.

അമേരിക്കന്‍ ദാരിദ്ര്യത്തിന്റെ മറ്റൊരു മുഖമാണ് Mc Donalds- സിലെ ഭക്ഷണവും, അമിതവണ്ണവും പിന്നെ ഡിപ്രഷനും. ഇത് മൂന്നും ചേരുന്നതാണ് പ്രഷ്യസ് എന്ന കഥാപാത്രം. ഒരു പരിധി വരെ താഴേക്കിടയിലുള്ള യഥാര്‍ത്ഥ ആഫ്രിക്കന്‍ അമെരിക്കന്‍ സ്ത്രീയുടെ പ്രശ്നങ്ങളിലൂടെ കഥ പറഞ്ഞെങ്കിലും പ്രഷ്യസിന് മുന്നോട്ട് നീങ്ങുവാനുള്ള അത്ര ശക്തമായ പ്രചോദനമൊന്നും സിനിമ നല്‍കുന്നില്ല. അപക്വമായ അവളുടെ സ്വപനലോകത്ത് അവളുടെ കാമുകന്‍ വെളുത്ത വര്‍ഗ്ഗക്കാരനായ യുവാവാണ് . കറുപ്പിനെ ഇഷ്ടപ്പെടാത്ത കറുത്തവരുടെ തന്നെ പ്രതിനിധിയാവാം പ്രഷ്യസ്. ഒരു പഴയ CNN സര്‍വ്വേ അതിനു അടിവരയിടുന്നതായി തോന്നുന്നു.

2009-ഇല്‍ പുറത്ത്‌ വന്ന പ്രേഷ്യസും 2010-ഇല്‍ ഇറങ്ങിയ ഉടാന്‍ എന്ന ബോളിവുഡ്‌ സിനിമയും ചില പ്രധാന ആശയങ്ങള്‍ പങ്ക് വയ്ക്കുന്നുണ്ട്. രണ്ടിലും child abuse തന്നെയാണ് മുഖ്യ ഘടകം. രണ്ട് സിനിമയുടെ അവസാനവും ഒന്ന് തന്നെ. ചെന്നായുടെ ഇടയില്‍ നിന്നും രക്ഷപെട്ട് സ്വയം സ്വാതന്ത്ര്യം പ്രഘ്യാപിക്കുന്ന കുഞ്ഞാടുകളുടെ കഥയാണ്‌ രണ്ടിലും കാണാന്‍ കഴിയുന്നത്.

പ്രഷ്യസ് എന്ന സിനിമയെ മഹത്തരമാക്കുന്നത് ചില അഭിനയ മുഹൂര്‍തങ്ങള്‍ മാത്രമാണ്. മേരിയെ അവതരിപ്പിച്ച മോനിക് തന്നെയാണ് അതില്‍ മുന്‍പന്തിയില്‍. പ്രഷ്യസിനു ജീവന്‍ പകര്‍ന്ന ഗബൊരി സിട്ബി മനസ്സില്‍ അല്പകാലമുണ്ടാവും.
സിനിമ അവസാനിക്കുമ്പോള്‍ ഇങ്ങനെ എഴുതി കാണിക്കുന്നു. For Precious girls everywhere.

ജനശബ്ദം

2010-10-05T19:47:00.000-07:00

കുറച്ച് ദിവസങ്ങള്‍ക്ക് മുന്‍പ് നാട്ടിലെ ഒരു സുഹൃത്ത്‌ ഇമെയില്‍ വഴി അയച്ചു തന്നതാണ് ഈ ലഖുലേഖ. സ്വന്തം നാടിനെ കുറിച്ചുള്ള വികാരത്തെക്കാള്‍ ഉപരിയായി തോന്നിയത്‌ ഇതിനു മുന്നിട്ടിറങ്ങിയ പാര്‍ടി ലേബലിലാത്ത സാധാ ജനത്തെ കുറിച്ചുള്ള അഭിമാനമായിരുന്നു. ഈ വികാരം ചിലപ്പോള്‍ അതിരമ്പുഴയില്‍ മാത്രമായി ഉടലെടുക്കുന്ന ഒന്നാകണമെന്നില്ല. പ്രതിഷേധം അതിന്‍റെ പാരമ്യത്തില്‍ എത്തുമ്പോള്‍
ജനം ചോദ്യം ചെയ്യുന്ന ഈ രീതി അതിരമ്പുഴയിലെ പോലെ പല സ്ഥലങ്ങളിലും വ്യാപകമാകേണ്ടിയിരിക്കുന്നു. പഞ്ചായത്തിലെ എല്ലാ വിടുകളിലും പത്രത്തോടൊപ്പം ഇത് എത്തിക്കുവാന്‍ കഴിഞ്ഞുവെന്നാണ് അറിയാന്‍ കഴിഞ്ഞത്.

സിനിമ പാരഡിസൊയിലെ കാഴ്ചകള്‍

2010-02-09T19:03:00.001-08:00

സിനിമ പാരഡിസൊ എന്ന ഇറ്റാലിയന്‍ സിനിമയെ കുറിച്ച് ഒരു പാട് ലേഖനങ്ങളും പഠനങ്ങളും
ഇതിനോടകം ഉണ്ടായിട്ടുണ്ട്. ഗിസിപ്പെ ടോര്‍ണടോരെ എന്ന ഇറ്റാലിയന്‍ സംവിധായകന്‍റെ 1988-ഇല്‍ റിലീസ്‌ ചെയ്ത ചിത്രം ആദ്യം വന്‍ പരാജയമായിരുന്നു. എന്നാല്‍ ഇതേ സിനിമ വെട്ടി ചുരുക്കി അന്താരാഷ്ട്ര പ്രദര്‍ശനത്തിന് എത്തിയപ്പോള്‍ വന്‍ വിജയമായി. ഇറ്റലിയില്‍ പോലും ഈ രണ്ടാം വരവിലാണ് ചിത്രം വിജയിക്കുന്നത്.

സിനിമയുടെ പ്രധാന അംശം അതിലെ നൊസ്റ്റാള്‍ജിയയാണ്. സിനിമ തുടങ്ങുന്നത് നായകനായ സാല്‍വതോരയെ അദ്ധേഹത്തിന്‍റെ അമ്മ സുഹൃത്തിന്‍റെ മരണം വിളിച്ചറിയിക്കുന്ന രംഗത്തോടെയാണ്. 30 വര്‍ഷങ്ങള്‍ക്ക് ശേഷമുള്ള അദേഹത്തിന്‍റെ തിരിച്ച് വരവിന് മുന്‍പ് സിനിമ 30 വര്‍ഷങ്ങള്‍ക്ക് പിന്‍പുള്ള ഫ്ലാഷ് ബാക്കിലേക്ക് പോവുകയാണ്.

1948 -ഇല്‍ ഇറങ്ങിയ Bicyle Theives നിയോ റിയലിസത്തിന്‍റെ ഉഗ്രരൂപമായിരുന്നെങ്കില്‍
സിനിമ പാരഡിസൊ എല്ലാ ഇസങ്ങളും ചേര്‍ത്തു വെച്ച ഒരു ചലച്ചിത്ര വിസ്മയമാണ്. സെന്റ്റിമെന്‍സും, കോമെഡിയും, പ്രണയവും, ദുരന്തവും എല്ലാം ചേര്‍ന്നുള്ള സിനിമയുടെ ഫ്ലാഷ് ബാക്ക് കഴിയുമ്പോള്‍ കഥാനായകന്‍ അനുഭവിക്കുന്ന നൊസ്റ്റാള്‍ജിയ അതിന്‍റെ ഒരു വലിയ അളവ് ഓരോ കാഴ്ച്ചക്കാരനിലുമെത്തിക്കാന്‍ സംവിധായകന്‍ ടോര്‍ണടോരെ യ്ക്ക് കഴിഞ്ഞിട്ടുണ്ട്.

കഥാനായകനായ സാല്‍വഡോരെയുടെ കുട്ടികാലത്ത്‌ തുടങ്ങുന്ന സിനിമ പ്രേമം ലോക്കല്‍ തിയേറ്ററായ സിനിമ പാരഡിസൊയിലെ പ്രോജെകഷനിസ്റ്റു ആല്‍ഫ്രെഡോയുമായുള്ള ചങ്ങാത്തത്തിലെത്തിക്കുന്നു. എട്ടു വയസ്സുകാരന്‍ പയ്യനും കിളവന്‍ ആല്‍ഫ്രെഡോയുടെയും തമ്മിലുള്ള സൗഹൃദത്തിനു പല തലങ്ങളാണ് ഉള്ളത്. ഇതേ സൌഹൃദത്തിന്‍റെ അധികം വ്യത്യസ്തമല്ലാത്ത മലയാളം പതിപ്പ്‌ തന്നെയല്ലേ കാഴ്ച എന്ന സിനിമയുടെ ആകര്‍ഷണിയങ്ങളായ പല രംഗങ്ങളിലും സംവിധായകന്‍ ബ്ലെസ്സിയും വരച്ചു കാട്ടാന്‍ ശ്രമിക്കുന്നത്. ഈ രണ്ടു സിനിമകളും കണ്ടിട്ടുള്ളവര്‍ക്ക് അതിനെ കുറിച്ച് വ്യത്യസ്തമായ ഒരു അഭിപ്രായമുണ്ടാവാന്‍ സാധ്യതയില്ല. അതിനെ ക്കുറിച്ച് പിന്നീട് പറയാം.

ആല്‍ഫ്രെഡോയും ടോട്ടോ (സാല്‍വതോരെയുടെ കുട്ടിക്കാലത്തെ പേര്) എന്ന കൊച്ചു കഥാപാത്രവും ഉജ്ജ്വല പ്രകടനമാണ് സിനിമയിളുടെനീളം കാഴ്ച വച്ചിരിക്കുന്നത്.
വിദ്യാഭ്യാസം നന്നേ കുറവുള്ള ആല്‍ഫ്രെഡോയ്ക്ക് കൊച്ചു ടോട്ടോയോടൊപ്പം സ്ക്കൂളില്‍ പരിക്ഷ എഴുതേണ്ടി വരുന്നു. പ്രോജെക്ടര്‍ കൈകാര്യം ചെയ്യുന്ന വിദ്യ പഠിപ്പിക്കാമെന്ന കരാറില്‍ ടോട്ടോ ഉത്തരങ്ങള്‍ കിളവന് കാണിച്ചു കൊടുക്കുന്നു. ഈ രംഗം സിനിമയുടെ ഏറ്റവും മനോഹരമായ രംഗങ്ങളില്‍ ഒന്നാണ്. തിയറ്ററില്‍ സെക്കന്‍റ് ഷോ കാണാന്‍ പറ്റാതെ വരുന്ന സിനിമാ ആരാധകര്‍ക്ക്‌ ബാലകണിയില്‍ നിന്നും പ്രോജെക്ടര്‍ തെരുവിലേക്ക് തിരിച്ച് വെച്ച് ആള്ഫ്രഡോയും ടോട്ടോയും മനോഹരങ്ങളായ സിനിമാ മുഹൂര്‍ത്തങ്ങലാണ് കാഴ്ച വെക്കുന്നത്. തെരുവിലെ ഒരു കെട്ടിടത്തിന്‍റെ ചുവരില്‍ ചലിക്കുന്ന ചിത്രം പതിയുമ്പോള്‍ കഥാപാത്രങ്ങളോടൊപ്പം നമ്മുടെ മനസ്സും നിറയുന്നു. ആ രംഗം കാഴച് വെക്കുന്നത് യഥാര്‍ത്ഥ സിനിമയുടെ ആഘോഷമാണ്. ഏത് ബൌദ്ധിക തലത്തില്‍ നിന്നും ആസ്വദിക്കാന്‍ പറ്റിയ മൂഹൂര്‍ത്തങ്ങളാണ് അവയൊക്കെയും.

സിനിമ പാരടിസോ എന്ന സിനിമയക്ക് എവിടെയൊക്കെയോ നഷ്ടപ്പെടുന്ന തുടര്‍ച്ച അതിന്‍റെ ചുരുക്കിയെടുത്ത രണ്ടാം പതിപ്പിന്‍റെ പോരായ്മയാണെന്ന് വേണമെങ്കില്‍ പറയാം.
നേരത്തെ പരാമര്‍ശിച്ചതു പോലെ സിനിമാ പാരഡിസോയും ബ്ലെസിയുടെ കാഴ്ച എന്ന സിനിമയും ചേര്‍ത്ത് വെച്ചുള്ള പരാമര്‍ശങ്ങളൊന്നും എവിടെയും കാണാന്‍ കഴിഞ്ഞില്ല. ലോകപ്രശസ്ത ചലച്ചിത്രകാരന്‍ സത്യ ജിത് റേയുടെ ആദ്യ ചിത്രമായ പഥേര്‍ പാഞ്ചാലി Bicycle thieves -ഇല്‍ നിന്നും പ്രചോദനമുള്‍കൊണ്ട് സംവിധാനം ചെയ്യപ്പെട്ടതാണ്. അങ്ങനെയാണെങ്കില്‍ അത് വീണ്ടും വിണ്ടും ആവര്‍ത്തിക്കപ്പെടെണ്ടുന്ന ഒരു നല്ല പ്രവണതയായിട്ടെ കാണാന്‍ കഴിയുകയുള്ളൂ. കാരണം കാഴ്ച പോലുള്ള സിനിമകളാണ് തീയേറ്ററില്‍ ആളെ കൂട്ടുന്ന നല്ല സിനിമകള്‍.

കാഴ്ച എന്ന സിനിമയില്‍ സിനിമ പാരടിസോയിലെ അംശങ്ങള്‍ പ്രജോദനമായിട്ടുണ്ടങ്കില്‍ ബ്ലെസ്സിക്ക്തീര്‍ച്ചയായും അഭിമാനിക്കാവുന്നതാണ്. കാരണം കഴിവുള്ള സംവിധായകന് മാത്രമേ ഇങ്ങനെയുള്ള സിനിമകളില്‍ നിന്നും കാര്യമായിട്ടു എന്തെങ്കിലും അടര്‍ത്തിയെടുക്കാന്‍ പറ്റൂ. ഈ രണ്ടു സിനിമകള്‍ തമ്മിലുള്ള ചെറുതും വലുതുമായ താരതമ്യങ്ങള്‍ ഇവിടെ നിരത്തുന്നത് ബാലിശമായ കാര്യമായിട്ട് തോന്നുന്നു. എന്നാല്‍ പ്രജോദനങ്ങള്‍ വെളിപ്പെടുത്തപെടാതിരിക്കുമ്പോള്‍ പിന്നിട് അത് തിരിച്ചറിയുമ്പോള്‍ മോഷണമായി വരെ തെറ്റിദ്ധരിക്കപ്പെടാന്‍ സാധ്യതകള്‍ കൂടുതലാണ്. ഈ രണ്ടു സിനിമകളും കണ്ടിട്ടുള്ളവര്‍ തന്നെ അതിനെ വിലയിരുത്തട്ടെ.

സിനിമ പാരഡിസൊയെ കുറിച്ചുള്ള വിസദികരണങ്ങള്‍ ഇവിടെ അവസാനിക്കുന്നില്ല. ഓരോ തവണ കാണുമ്പോഴും ആസ്വാദനത്തിനു ഒരു കോട്ടവും തട്ടുന്നില്ല. അത്രയ്ക്കുണ്ട് സിനിമ പാരഡിസൊ സൃഷ്ടിക്കുന്ന ഗൃഹാതുരത്വം

ഋതു - സംവിധായകന് പറ്റിയ അബദ്ധമൊ അതൊ പരാജയമൊ ?

2010-01-09T15:09:00.000-08:00

ശ്യാമപ്രസാദ് സംവിധാനം ചെയ്ത ഋതു മുന്നു സുഹ്രത്തുക്കളുടെ കഥയാണ് പറയുന്നത്. കാലത്തിനനുസരിച്ച് മാറുന്ന സൌഹ്രദം സുഹ്രത്തുക്കള്‍ക്കിടയില്‍ സ്രഷ്ടിക്കുന്ന മാനസിക നൊമ്പരങ്ങളുടെയും യാഥാര്‍ത്ഥ്യങ്ങളെ ഉള്‍കൊണ്ട് മുന്‍പോട്ട് നിങ്ങാന്‍ പ്രേരിതരാവുന്ന കഥാപാത്രങ്ങളെയും വരച്ച് കാട്ടാന്‍ ശ്രമിക്കുകയാണ് സംവിധായകന്‍ ശ്യാമപ്രസാദ്. കഥാപാത്രങ്ങള്‍ക്ക് തങ്ങള്‍ നിശ്ചയിച്ചിരിക്കുന്ന സൌഹ്രദത്തിന്റെ ആഴം പ്രേക്ഷകരിലെത്തിക്കാനുള്ള ശ്രമം സംവിധായകന്‍ ശ്യാമപ്രസാദിനും തിരക്കഥാക്രത്ത് ജോഷ്വാ ന്യൂട്ടനും കഴിഞ്ഞിട്ടില്ല എന്നത് വ്യക്തമാണ്. ഇവിടെ സൌഹ്രദം ഒരു കോപ്രായമായിട്ടാണ് കാണാന്‍ കഴിയുന്നത്.

ഋതുക്കള്‍ മാറുന്നത് പോലെ സുഹ്രത്തുക്കളും സുഹ്രദ് ബന്ധങ്ങളും മാറുന്ന ഒരു പ്രതിഭാസം എന്നാല്‍ ഈ മനോഹരമായ ആശയത്തിന് ചേരാത്ത പോലെയായിരുന്നു ഋതുവിന്റെ കഥയും തിരക്കഥയും. ശ്യാമ പ്രസാദ് എന്ന സംവിധായകനില്‍ നിന്നും ഒരിക്കലും പ്രതിക്ഷിക്കാത്ത ഒരു ചിത്രം. തന്റെ മുന്‍കാല ചിത്രങ്ങളില്‍ നിന്നും അദ്ദേഹം ഒരുപാട് പിന്നോക്കം പോയത് പോലെ തോന്നിപ്പോവുകയാണ്. മലയാളിക്ക് എന്നും ഓര്‍മ്മിക്കാവുന്ന ക്ലാസിക്ക് ടിവി പരമ്പരകള്‍ സമ്മാനിച്ച സംവിധായകന്‍ ഋതുക്കള്‍ മാറുന്നത് പോലെ മാറുകയാണോ.

ഐ ടി മേഖലയില്‍ ശമ്പളം മറ്റ് ജോലികളെ അപേക്ഷിച്ച് കൂടുതലാണ്. എന്നാല്‍ അവരുടെ ജീവിത രീതി സിനിമയില്‍ പറഞ്ഞിരിക്കുന്നത് പോലെ കടിച്ചാല്‍ പൊട്ടാത്ത ഇംഗ്ലിഷും, പാര്‍ട്ടികളും, ഡേറ്റിങ്ങും എല്ലാംകൂടി ചേര്‍ന്ന ഒരു അവിഞ്ഞ സംസക്കാരമാണൊയെന്ന് തിരക്കഥാക്രത്ത് അന്വഷിക്കേണ്ടിയിരിക്കുന്നു. ഓരോ മേഖലയും സിനിമയക്ക് പ്രമേയമാക്കുമ്പോള്‍ തിരക്കഥാക്രത്ത് ഒരു പഠനം നടത്തേണ്ടത് അത്യാവശ്യമാണ്. കാരണം ഈ മേഖല സിനിമയില്‍ ചിത്രീകരിച്ചിരിക്കുന്നതില്‍ നിന്നും വ്യത്യസഥമാണെന്ന് മാ‍ത്രമല്ല തെറ്റായ സന്ദേശവും നല്കുന്നു.

ഈ സിനിമയക്ക് പ്രേക്ഷകന്റെ മനസ്സിന്നെ സ്വാധീനിക്കാന്‍ കഴിഞ്ഞിട്ടില്ലെങ്കില്‍ അതിന്റെ കാരണം ശക്തമല്ലാത്ത തിരക്കഥ തന്നെ. പിന്നെ ആണ്‍-പെണ്‍ സൌഹ്രദം അതിന്റെ പാരമ്യത്തില്‍ എത്തി എന്നു തോന്നിപ്പിക്കുവാന്‍ വേണ്ടി കത്തി നിറച്ച കുറെ ക്രത്രിമ സംഭാഷണങ്ങളും അനാവശ്യ സീനുകളും. നായികയും സുഹ്രത്തുക്കളും കടയില്‍ പോയി ഒരു വലിയ പെട്ടി ഡോട്ടട് കോണ്ടം ചോദിച്ചു വാങ്ങുന്നതും കടക്കാരന്‍ അതുമായി വരുമ്പോള്‍ ഇറങ്ങിയോടുന്നതും പിന്നെ നിര്‍ത്തിയിട്ടിരിക്കുന്ന കാര്‍ കുലുക്കി നാട്ടുകാരെ തെറ്റിദ്ധരിപ്പിക്കുന്നതുമെല്ലാം ഉദ്ദാഹരണങ്ങള്‍ മാത്രം.

മറ്റ് ശ്യാമപ്രസാദ് സിനിമകള്‍ പോലെ ഋതുവും ദ്രശ്യാവിഷ്ക്കാരത്തില്‍ വളരെ മെച്ചപ്പെട്ട് തന്നെ നില്ക്കുന്നു. ലാറ്റിനമേരിക്കന്‍ സിനിമകളിലെവിടെയോ കണ്ടു മറന്നു പോയ ചില ഷോട്ടുകള്‍ക്ക് സമാനമായ ദ്രശ്യങ്ങള്‍ അനവസരോചിതമാണെങ്കില്‍ കൂടി സിനിമയക്ക് ഒരു യുവത്വത്തിന്റെ നിറം നല്കുന്നു.

ലളിതമായി പറഞ്ഞ കഥയായിട്ടുകൂടി എത്ര പേര്‍ക്ക് സിനിമയുടെ പേരിലെ ആശയം അല്ലെങ്കില്‍ സംവിധായകനും തിരക്കഥാക്രത്തും ഉദ്ദേശിച്ച ആശയം പ്രേക്ഷകമനസുകളില്‍ എത്തിക്കാന്‍ കഴിഞ്ഞു. ഋതു സംവിധായകന് പറ്റിയ അബദ്ധമായിട്ട് പറയാന്‍ കഴിയില്ല കാരണം താന്‍ ഇഷ്ടപ്പെട്ട് സ്വീകരിച്ച തിരക്കഥ സിനിമയില്‍ പരാജയപ്പെട്ടാല്‍ അത് സംവിധായകന്റെ പരാജയമാണ്. കാരണം സിനിമ സംവിധായകന്റെ സ്രഷ്ടിയാണെന്നാണല്ലൊ പറയപ്പെടുന്നത്.

ശ്യാമപ്രസാദ് എന്ന സംവിധായകന്റെ കരിയര്‍ വിലയിരുത്തിക്കഴിഞ്ഞാല്‍ ഇത് വരെയുള്ളത് ഒരു ഉയര്‍ച്ചയുടെ പടവായിരുന്നു. ഋതു അദ്ദേഹത്തിന്റെ ആദ്യകാല ടെലിഫിലിമുകളുടെ നിലവാരം പോലും കാണിക്കുന്നില്ല എന്നത് പറയാതിരിക്കാന്‍ പറ്റാത്ത സത്യമാണ്.

ശ്യാമപ്രസാദ് എന്ന സംവിധായകനെ ഋതു-വെന്ന ഒറ്റ സിനിമകൊണ്ട് ഒരിക്കലും വിലയിരുത്തുവാന്‍ കഴിയില്ല. അദ്ദേഹം വരും കാലങ്ങളില്‍ ഒരു പാട് വിലയിരുത്തപ്പെടേണ്ട ഒരു സംവിധായകനാണ്. കാരണം അദ്ദേഹത്തിന്റെ മുന്‍കാല സിനിമകളും ടിവി പരമ്പരകളും മലയാളത്തിലെ എക്കാലത്തെയും മികച്ചവ തന്നെയാണ്.

ഒബാമ‍ മാറ്റത്തിന്റെ കൊടുങ്കാറ്റാവട്ടെ

2008-08-31T20:32:00.000-07:00

ഒരു പക്ഷെ ലോകം ഇന്നു എറ്റവും കൂടുതല്‍ ഉറ്റു നോക്കുന്നത് ഈ ഒരു വ്യക്തിയിലേക്കായിരിക്കും, ഡമൊക്രാറ്റിക് പാര്‍ട്ടിയുടെ പ്രെസിഡന്റ് സഥാനാര്‍ത്ഥി, മാറ്റത്തിന്റെ മുദ്രാവാക്യവുമായി വന്ന് ഇതിനോടകം തന്നെ അമേരിക്കയിലും ലോകത്തുടനീളവും ചര്‍ച്ചാവിഷയമായ ആഫ്രിക്കന്‍ അമേരിക്കന്‍ പൌരനായ ഒബാമ എന്ന വ്യക്തിയിലേയ്ക്ക്.

എന്തിലും ഏതിലും സ്വതന്ത്രമായി മുന്നേറുന്ന അമേരിക്ക വെല്ലുവിളികളില്ലാതെ മുന്നേറുന്നത് ലോകമെന്നും അസൂയയോടും തെല്ല് ഭയത്തോടുമാണു കണ്ടിരുന്നത്. അമേരിക്കയുടെ അതിശക്തമായ ഈ മുന്നേറ്റം ലോകത്തിനുമേല്‍ വന്‍ സ്വാതീനം ചെലുത്തുവാനിടയാക്കി. അമേരിക്കന്‍ കംബനികളില്ലെങ്കില്‍ ഇന്‍ഡ്യന്‍ ഐ.ടി മേഖല നൂറിലൊന്നായ്യി ചുരുങ്ങുമെന്നുള്ളത് നമ്മള്‍ അംഗീകരിചില്ലെങ്കിലും യാഥാര്‍ഥ്യമാണ്.

വംബന്‍ വിജയങ്ങള്‍ക്കിടയില്‍ 9/11 ദുരന്തം അമേരിക്കന്‍ ജനതയുടെ സ്വാതത്ന്ര്യയത്തിന് മേല്‍ ഭീതിയുടെ കരിനിഴല്‍ പരത്തി.ഭയന്നു ഭിതിയിലാണ്ട അമേരിക്കന്‍ ജനതയുടെ ദൌര്‍ബല്ല്യം മുതലാക്കി ജോര്‍ജ് ബുഷ് വീണ്ടും അധികാരത്തില്‍ വന്നു. ഈ നൂറ്റാണ്ടില്‍ ലോകത്തിന് ഏറ്റവുമധികം സംഭാവനകള്‍ നല്‍കിയ രാജ്യം അമേരിക്കയാണെന്ന് ശത്രുരാജ്യങ്ങള്‍ക്ക് പോലും സമ്മതിക്കാതെ തരമില്ല.അതോടൊപ്പം തന്നെ അഫ്ഗാനിസ്ഥാനിലെയും ഇറാക്കിലെയും സാധരണക്കാരയ നിരപരധികളായ മനുഷ്യരുടെ പേടി സ്വപ്നവും ഈ അമേരിക്ക തന്നെയായിരുന്നു. ആ രാജ്യത്തെ യുവാക്കളുടെ സ്വപനങ്ങളിലും പ്രതീക്ഷകളിലും മണ്ണു വാരിയിട്ട അമേരിക്കയക്ക് വിശ്വസനീയങ്ങളായ ന്യായീകരണങ്ങളോന്നും തന്നെയില്ല. ഈയവസര്‍ത്തിലാണ് ഒബാമ എന്ന കറുത്ത വര്‍ഗ്ഗക്കാരന്‍ ലോക ശ്രദ്ത നേടുന്നത്. താന്‍ പ്രെസിഡന്റ് സ്ഥാനാര്‍തിയാകുന്നതിനു മുന്‍പ് തന്നെ അമേരിക്കയുടെ ഇറാക്ക് അധിനിവേശത്തെ ശക്തമായ ഭാഷയില്‍ എതിര്‍ത്ത വ്യക്തിയാണ് ഒബാമ. അമേരിക്കയുടെ ഇറാക്കിലെ എല്ലാവിധ പരിക്ഷണങ്ങളും ഒരു വന്‍ പരാജയമായിരുന്നുവെന്ന് ബുഷും അനുയായികളും ഒഴിച്ച് അമേരിക്കന്‍ ജനത ഉള്‍പ്പെടെയുള്ള ലോകസമുഹം മനസ്സിലാക്കിയപ്പോള്‍ ഒബാമയുടെ വാക്കുകള്‍ക്ക് പ്രാധാന്യമേറി. ലോകം ആ വ്യക്തിയിലേക്ക് ഉറ്റു നോക്കി തുടങ്ങി.

അമേരിക്ക പല കാര്യങ്ങളിലും സുരക്ഷിതമല്ലെന്നും അതിന് ശക്തമായ മാറ്റം അനിവാര്യമാണെന്നും തന്റെ പരമപ്രധാന ലക്ഷ്യം അത് മാത്രമായിരിക്കുമെന്നും ഒബാമ പ്രെഖ്യാപിച്ചു കഴിഞ്ഞു. അദ്ദേഹത്തിന്റെ പ്രഖ്യാപനങ്ങളില്‍ അപ്രായോഗികമായി ഒന്നും തന്നെയില്ല, പക്ഷെ അത് അമേരിക്കയുടെ യഥാര്‍ത്ഥ മുതലാളികളായ എണ്ണ കംബനികളുടെയും ആയൂധ കച്ചവടക്കാരെന്റെയും ഉറക്കം കെടുത്തുമെന്നതില്‍ തര്‍ക്കമില്ല. ഒബാമയുടെ വാഗ്ദാനങ്ങളില്‍ പലതും ശ്രദ്തിക്ക്പ്പെടേണ്ടതാണ്. അവയില്‍ ചിലത് ഇന്‍ഡ്യക്ക് പ്രയോജനപ്പടില്ല എന്നതു മറുവശം. (അങ്ങനെയെങ്കിലും കുറച്ച് കാര്യങ്ങളില്‍ നമ്മുക്ക് സ്വയം പര്യാപ്തത നേടാം).

ഇറാക്കില്‍ നിന്നും അമേരിക്കന്‍ പട്ടാളത്തിന്റെ പൂര്‍ണ്ണമായ പിന്‍വാങ്ങല്‍.

ഇടത്തരക്കാര്‍ക്ക് ടാക്സ് ഇളവ്

ഊര്‍ജ്ജ പ്രതിസന്ധി പരിഹരിക്കുന്നതിനു പകരം സംവിധാനങ്ങള്‍ക്ക് മുന്‍ഗണന നല്കുക അതവഴി 5 മില്ല്യണ്‍ തോഴില്‍ ഉറപ്പാക്കുക. അതുവഴി എണ്ണക്കംബനികളുടെ കുത്തക അവസാനിപ്പിക്കുക.

തീവ്രവാതം ഇല്ലായ്മ ചെയുന്നതിന് തുറന്ന ചര്‍ച്ചകള്‍.

കുറഞ്ഞ ചിലവില്‍ സാധാരണക്കാര്‍ക്ക് താമസ സൌകര്യം.

എല്ലാ അമേരിക്കന്‍ പൌരനും മെഡിക്കല്‍ ഇന്‍ഷുറന്‍സ് പദ്ധതി.

മുകളില്‍ പറഞ്ഞ കാര്യങ്ങള്‍ ജൊര്‍ജ് ബുഷ് കഴിഞ്ഞ 8 വര്‍ഷത്തിനുള്ളില്‍ ചിന്തിച്ചിട്ട് പോലുമുണ്ടാവില്ല. സാധാരണക്കാരെന്റെ പ്രശനങ്ങള്‍ മനസ്സിലാക്കണമെങ്കില്‍ അവരിലേക്ക് ഇറങ്ങി ചെല്ലണം. ഒബാമയുടെ വളര്‍ച്ച തന്നെ ഷിക്കാഗൊയിലെ സാധാരണ സമൂഹത്തിന്റെ പ്രശനങ്ങള്‍ പഠിച്ചും അത് പരിഹരിക്കുന്നതിലൂടെയുമായിരുന്നു. ഇന്ന് സാധാര്‍ണക്കാരായ ഓരൊ അമേരിക്കകാര‍നും താന്‍ തൊഴില്‍ പരമായും സാംബത്തികമായും ഒട്ടും സുരക്ഷിതരല്ലെന്ന് തിരിച്ചറിഞ്ഞു കഴിഞ്ഞു. ഓരൊ മാസവും തൊഴില്‍രഹിതരാകുന്നവരുടെ എണ്ണമെടുത്താല്‍ മാത്രം മതി അതിന്റെ തീവ്രത മനസ്സിലാക്കാന്‍. ഇക്കഴിഞ്ഞ ഡമൊക്രാറ്റിക്ക് കണ്‍വന്‍ഷനില്‍ തന്റെ പ്രെസിഡന്റ് സഥാനാര്‍തിത്വം പ്രെഖ്യപിക്കുന്നതോടൊപ്പം തന്നെ ബുഷിനും മ്ക്കെയിനുമെതിരെ ശക്തമായ വിമര്‍ശനമാണ് ഒബാമ അഴിച്ച് വിട്ടത്.

അമേരിക്കന്‍ പ്രസിഡന്‍ഡ് എന്ന വ്യക്തിക്ക് ലോകത്ത് ഏറ്റവുമധികം സ്വാധീനം ചെലുത്താന്‍ കഴിവുള്ള ആളാണ്. അത് അയാളുടെ വ്യക്തിത്വമൊ കഴിവിനെയോ ഒന്നും ആശ്രയിച്ചല്ല മറിച്ച് ആ രാജ്യത്തിന്റെ സാംബത്തികവും ശാസ്ത്രിയവുമായ മുന്നേറ്റം ഇന്നും ലോകത്തെ ഭരിച്ച് കൊണ്ടിരിക്കുന്നു. അവിടെ പരമാധികാരി സ്വാര്‍തഥ ലക്ഷ്യങ്ങളുടെയും അനാവശ്യ യുദ്ധങ്ങള്‍ക്കും ചുക്കാന്‍ പിടിക്കുബോള്‍ സ്വന്തം രാജ്യത്തിനും എന്തിന് ലോകത്തിന് തന്നെ അത് ഭീഷണി ഉയര്‍ത്തുന്നു.

ഒബാമയുടെ മാറ്റത്തിന്റെ മുദ്രാവാക്ക്യം പുതിയ പ്രത്യയശാസ്ത്രങ്ങള്‍ക്ക് വഴി തുറക്കട്ടെ. നേരാണ്, മാറ്റം ഇന്ന് അനിവാര്യമാണ് അമേരിക്കയില്‍ മാത്രമല്ല ലോകത്ത് ദാരിദ്ര്യവും ,യുദ്ധവും, അഴിമതിയമുള്ള എല്ലാ നാടും മാറ്റത്തിനായ് കാതോര്‍ത്തിരിക്കുവാണ്. ചുരുങ്ങിയ കാ‍ലയളവില്‍ തന്നെ ഒബാമ ചര്‍ച്ചാവിഷയമായി ജന ഹ്രദയങ്ങളില്‍ സ്ഥാനവും നേടി. ചോദ്യങ്ങള്‍ക്കുള്ള വ്യക്തമായ മറുപടിയും വേരിട്ട കാഴ്ചപ്പാടും ഓരോ ദിവസവും അദ്ദേഹത്തിന്റെ ആരാധകരുടെ എണ്ണം വര്‍ധിപ്പിക്കുന്നു. അദ്ദേഹത്തിന്റെ മാറ്റത്തിന്റെ മണിനാ‍ദം ഭൂരിപക്ഷം അമേരിക്കകാര്‍ന്റെയും ചെവികളില്‍ പതിഞ്ഞൊ എന്നുള്ളത് നവംബര്‍ 4 വരെ കാത്തിരിക്കേണ്ടിയിരിക്കുന്നു. വിശ്വസനീയമായ ആ മാറ്റത്തിനായ് കാതോര്‍ക്കാം.